ភ្នំពេញ៖ គ្រូបារមី និងគ្រូអូមអាមមួយចំនួនដែលបញ្ចេញវីដេអូអំពីសកម្មភាពផ្សេងៗនៅលើបណ្តាញសង្គមបង្កផលប៉ះពាល់ដល់តម្លៃសាសនា និងសង្គម ត្រូវបានមន្ទីរធម្មការ និងសាសនារាជធានីភ្នំពេញចុះទៅណែនាំឱ្យធ្វើកិច្ចសន្យាបញ្ឈប់រាល់សកម្មភាពបង្ហោះវីដេអូរាល់សកម្មភាពរបស់ខ្លួនលើបណ្តាញសង្គម។
នៅរយៈពេល ១សប្តាហ៍កន្លងទៅនេះ មន្ទីរធម្មការរាជធានីភ្នំពេញ បានចុះទៅដល់ទីតាំងរបស់គ្រូបារមីមួយចំនួនដែលរងការរិះគន់ពីមហាជននៅលើបណ្តាញសង្គមដោយបានចោទថា ជាគ្រូបារមីគ្មានមូលដ្ឋានច្បាស់លាស់ដើម្បីធ្វើឱ្យតែមហាជនជឿ បង្កភាពវឹកវរដល់សង្គម និងខូចតម្លៃសាសនា។ វិធានការនេះមិនមែនធ្វើឡើងជាលើកទី១ នោះទេ ពោលកន្លងមកមន្ទីរធម្មការ និងសាសនា រាជធានីភ្នំពេញក៏ធ្លាប់បានចុះអនុវត្តផងដែរ ដោយឱ្យគ្រូបារមីទាំងនោះបញ្ឈប់ការផ្សព្វផ្សាយ និងលុបរាល់សកម្មភាពលើបណ្តាញសង្គម។
ដោយសង្កេតឃើញ នៅតែបន្តមានវីដេអូបង្ហោះលើបណ្តាញសង្គម ហើយម្ចាស់វីដេអូខ្លះពុំទាន់បានលុបចោល មន្ទីរធម្មការ និងសាសនារាជធានីភ្នំពេញបានបន្តចុះទៅណែនាំឱ្យគ្រូបារមីទាំងនោះធ្វើកិច្ចសន្យាសាជាថ្មី។ ក្នុងលិខិតកិច្ចសន្យារបស់គ្រូបារមីទាំងនោះបានបញ្ជាក់ឱ្យដឹងថា រាល់វីដេអូដែលបន្តមានវត្តមាននៅក្នុងបណ្តាញសង្គម គឺជាវីដេអូចាស់ ដែលផេកមួយចំនួនយកមកផុសដើម្បីផលប្រយោជន៍ខ្លួនឯងតែប៉ុណ្ណោះ។
យ៉ាងណាមិញមន្ទីរធម្មការ បានណែនាំឱ្យ មហាជនដែលប្រើប្រាស់បណ្តាញសង្គមទាំងអស់ បញ្ឈប់បង្ហោះវីដេអូចាស់ៗកន្លងមក ឬវីដេអូថ្មីៗ ពាក់ព័ន្ធនឹងគ្រូបារមី គ្រូអូមអាមផ្សេងៗ ប្រសិនមិនបញ្ឈប់នោះទេ មន្ទីរធម្មការនឹងចាត់វិធានការតាមផ្លូវច្បាប់ជាធរមាន។
មហាជនគាំទ្រចំពោះចំណាត់ការលើគ្រូបារមីទាំងនោះ តែយ៉ាងណាមហាជនចង់ឃើញក្រសួងធម្មការ និងសាសនា បន្តមានវិធានការចំពោះស្ត្រីលក់អនឡាញម្នាក់ទៀតដែលតាំងខ្លួនថាមានបារមីមកសណ្ធិតជួយសង្គ្រោះទឹកដីកម្ពុជា៕
